Gipakusgan pa ang kampanya sa Land Transportation Office (LTO) Region 7 batok sa mga ilegal nga pampasaheroang sakyanan, diin 21 ka mga sakyanan ang nadakpan ug gikumpiska sa serye sa operasyon nga gipahigayon gikan Hulyo 16 hangtod 21, 2026.
Gipangulohan sa Regional Law Enforcement Service–Field Enforcement Unit (RLES-FEU) ang maong operasyon ubos sa mando ni Regional Director Atty. Wendel C. Dinglasan.
Gitutokan niini ang mga colorum nga public utility vehicles (PUVs), mga taxi nga nag-overcharge, contracting, paglapas sa fare meter regulations, ug uban pang dili awtorisadong serbisyo sa transportasyon sa North Cebu, Lapu-Lapu City, ug South Road Properties (SRP).
Sumala ni Dinglasan, padayon nga gisuportahan sa LTO Region 7 ang mga lehitimong public transport operators, apan hugot usab nilang ipatuman ang balaod batok sa mga nagpadagan og iligal nga operasyon ug nagapahimulos sa mga pasahero pinaagi sa dili patas nga pamaagi.
Gipasabot usab sa opisyal nga dili mohunong ang ahensya sa ilang anti-colorum campaign, nga nagtumong sa pagpanalipod sa riding public ug pagsiguro nga legal, luwas, ug patas ang mga serbisyo sa pampublikong transportasyon sa rehiyon.
Sa datos sa Hulyo 21, 2026, miabot na sa 21 ka iligal nga nag-operate nga sakyanan ang nakumpiska sa LTO Region 7 sulod lamang sa bulan sa Hulyo, samtang nagpadayon ang ilang mga enforcement operations sa nagkalain-laing bahin sa Central Visayas.
Photo courtesy: LTO Region 7 – Central Visayas
