Gipadayon sa P-pop group nga SB19 ang pagbayaw sa ngalan sa Pilipinas sa internasyonal nga entablado human sila mapili nga pinakaunang Filipino group nga mopahigayon sa ceremonial first pitch sa usa ka dula sa Major League Baseball (MLB) sa Estados Unidos. Ipahigayon kini sa mga miyembro nga sila si Pablo, Stell, Ken, Josh, ug Justin sa duwa tali sa Chicago White Sox ug New York Yankees karong Hulyo 29 sa Rate Field sa Chicago.
Kabahin kini sa ilang masubsob nga Global Promo Tour karong Hulyo ug Agosto, diin lakip usab sa ilang nakatala nga kalihokan ang performance sa Grammy Museum sa Hulyo 28, ilang debut sa sikat nga Lollapalooza festival sa Hulyo 30, mga fan meet sa US ug Japan, ug ang pag-apil sa Summer Sonic. Pinaagi niini, makig-uban ang SB19 sa pipila lamang ka mga inilang Pilipino nga nakahimo na sa maong dungog sa MLB sama nila Manny Pacquiao, Liza Soberano, ug Jo Koy.
Dali nga gibahaan sa mga mensahe sa pagpahalipay ug suporta gikan sa ilang fanbase nga A’TIN ang social media tungod niining bag-ong kalampusan. Mas nagkakusog usab ang internasyonal nga lakang sa grupo human sila opisyal nga gipailalom sa representasyon sa United Talent Agency (UTA), usa sa labing dako nga talent agency sa kalibutan
Photo Courtesy:Gregory Books
