Nabuak ang bag-ong Guinness World Record alang sa pinakadaghang nahuman nga skydives sulod sa usa ka adlaw human nakatala og 31,075 ka skydiving activities gikan sa 43 ka mga nasud sa tibuok kalibotan.
Ang maong makasaysayanong kalihokan gitawag nga World Skydiving Day, nga gipangulohan sa U.S. Parachute Association, Australian Parachute Federation, British Skydiving, ug Canadian Sport Parachuting Association niadtong Hulyo 11, 2026.
Sumala sa mga nag-organisar, nagkahiusa ug miapil sa maong kalihokan ang mga skydiver nga adunay nagkalainlaing lebel sa kasinatian. Lakip sa mga miapil ang mga first-time tandem jumpers, mga bag-o pa lang misulay sa maong isport, ug ang mga eksperto na kaayo nga mga skydiver.
Matod pa sa mga opisyal, ang maong bag-ong rekord nagpakita sa padayong pagtubo ug pagkapopular sa skydiving sa nagkalainlaing dapit. Nagpamatuod usab kini sa kapabilidad sa maong isport nga makadani og mga bag-ong partisipante samtang naghatag og pag-ila sa dedikasyon sa mga hanas nga skydiver sa tibuok kalibotan
Photo Courtesy:Instagram
