Usa ka talagsaong insidente ang nasinati sa mga bombero sa Kansas City human ilang giluwas ang usa ka lalaki nga naipit sulod sa tangke sa usa ka portable toilet sulod sa gibana-banang walo ka oras.
Nahitabo ang insidente samtang nangolekta ang mga trabahante sa portable restroom company sa mga portable toilet nga gigamit sa usa ka kalihokan. Usa sa mga unit ang nagpabiling nakasirado bisan pa og gihatagan na og igong oras ang tawo nga giingong anaa sa sulod aron mogawas.
Gitawag ang usa ka pulis nga miagi sa maong lugar aron motabang sa pag-abli sa pultahan. Apan sa dihang naablihan kini, walay tawo nga nakita sa sulod sa portable toilet.
Sa kalit lang, naabri ang taklob sa kasilyas ug mitunga ang ulo sa usa ka lalaki gikan sa lungag sa lingkoranan. Nadiskobrehan nga naipit diay siya sulod sa tangke sa hugaw ubos sa kasilyas ug dili na makagawas.
Gitawag dayon ang mga bombero, apan ilang namatikdan nga delikado kung pugson lang og ibira ang lalaki. Busa, gigamit nila ang espesyal nga mga gamit sa pagputol aron hinay-hinay nga gisi ang portable toilet hangtod makahimo og dakong agianan nga luwas niyang maagian.
Human maluwas, gilimpiyohan dayon ang lalaki pinaagi sa hose sa fire truck ug gidala sa mga responder aron mahatagan og dugang pag-atiman.
Sumala sa portable toilet company, giingon sa lalaki nga misulod siya sa tangke aron kuhaon ang usa ka botelya nga kuno nahulog didto sa miaging gabii. Gituohang didto siya naipit sulod sa mga walo ka oras hangtod nga nadiskobrehan ug naluwas.
Photo Courtesy: ExquisiteTaste
