Gipaniguro sa Department of Labor and Employment (DOLE) Zamboanga Sibugay nga magpadayon ang ilang mga programa alang sa mga mamumuo ug bulnerableng sektor sa komunidad.
Matud ni DOLE Zamboanga Sibugay Provincial Director Marlyn Anoos, padayon ang ahensya sa paghatag og serbisyo ug tabang sa mga nagkinahanglan ilabina sa informal sector workers, mga mamumuo, mag-uuma ug mangingisda.
Gipadayag usab niya nga pinaagi sa DOLE Integrated Livelihood Program (DILP) ug uban pang mga proyekto, gitinguha sa ahensya nga mapalambo ang panginabuhian sa mga benepisyaryo ug mamenosan ang kalisod sa ilang adlaw-adlaw nga kinabuhi.
Dugang pa niya, nagpadayon ang koordinasyon sa DOLE ug sa lokal nga panggamhanan aron mas mapadali ang paghatag og mga programa ug oportunidad sa trabaho alang sa katawhan.
Tumong sa ahensya nga mas daghang mga Pilipino ang makabaton og desenteng trabaho ug lig-on nga panginabuhian pinaagi sa nagkadaiyang programa sa gobyerno.
Photo Courtesy: Dole Ipil Zamboanga Sibugay
