Usa ka silingan ang nahimong hinungdan sa pagluwas sa tulo ka mga bata nga giingong nagpabiling naka-isolate sulod sa upat ka tuig sa ilang ginapuy-an sa Oviedo, Spain.
Ang maong silingan nga nailhan lamang sa ngalan nga Sylvia, nakamatikod sa mga kahimtang nga iyang giisip nga dili na normal sa pamilya nga bag-ong mipuyo sa ilang lugar sukad pa sa panahon sa pandemya sa COVID-19.
Matod sa mga taho, ang amahan lamang sa pamilya ang kanunay mogawas sa balay aron modawat sa mga grocery deliveries, samtang ang tulo ka mga bata panagsa ra makita ug mosilip lamang sa bintana sulod sa pipila ka gutlo.
Nadani usab ang atensyon ni Sylvia sa kanunay nga pagpa-deliver sa pamilya og daghang diaper bisan pa og gibanabana niyang walo hangtod napulo ka tuig na ang edad sa mga bata. Tungod niini, iyang gipahibalo ang kapolisan.
Human sa imbestigasyon, nasuta sa mga awtoridad nga ang tulo ka mga bata, duha ka otso anyos nga kambal ug usa ka 10 anyos, nga wala diay makagawas sa balay sulod sa upat ka tuig. Kanunay silang gisul-oban og diaper ug gipugngan pa gani sa paggamit sa kasilyas, nga maoy hinungdan sa seryosong constipation nga ilang nasinati.
Nasayran usab sa kapolisan nga ang mga ginikanan giingong adunay grabeng kahadlok nga matakdan sa COVID-19 ang ilang mga anak. Tungod niini, ilang gipahimulag ang pamilya sa usa ka dakong balay sa Spain ug gipugngan ang mga bata sa pakig-uban sa ubang tawo.
Sa resulta sa psychiatric evaluation, giingong ang magtiayon nag-antos sa COVID-19 anxiety syndrome, usa ka kahimtang diin adunay sobra nga kahadlok sa virus ug sobra nga paglikay sa mga lugar nga adunay ubang tawo.
Sa pagkakaron, ang tulo ka mga bata anaa na sa pag-atiman sa mga otoridad alang sa medical ug psychological evaluation, samtang ang ilang mga ginikanan nag-atubang sa nagkalainlaing kaso, lakip ang domestic violence with habitual psychological abuse. Samtang si Sylvia, ang silingan nga mipahibalo sa kapolisan, gidayeg sa Spanish media isip bayani tungod sa iyang nahimong papel sa pagluwas sa mga bata.
Photo Courtesy:pep. ph
