Gilauman nga magpadayon ang paghuyang sa Philippine peso batok sa dolyar sa mosunod nga mga bulan tungod sa pagsaka sa presyo sa lana sa kalibutan, lig-on nga panginahanglan sa dolyar, ug pagtaas sa importasyon sa nasud, sumala sa taho sa Business Monitor International (BMI), usa ka research unit sa Fitch Solutions.
Matod sa BMI, ang exchange rate sa piso posibleng maglihok tali sa ₱61 hangtod ₱63 matag usa ka US dollar sa umaabot nga mga bulan. Sa pagkakaron, ang piso nagpalibot na sa ₱61.61 batok sa dolyar, usa sa labing huyang nga lebel niini sa kasaysayan.
Gipasabot sa research firm nga ang bag-ong tensyon tali sa Estados Unidos ug Iran mahimong maka pataas pa sa presyo sa lana sa tibuok kalibutan. Tungod kay nagsalig ang Pilipinas sa imported nga lana, motaas usab ang gasto sa importasyon ug ang panginahanglan sa dolyar, nga makadugang sa pagkunhod sa bili sa piso.
Gidugang pa sa BMI nga misaka og 22.1 porsyento ang average nga importasyon sa nasud gikan Marso hangtod Mayo, ug gilauman pang mosamot kini sa ikatulong quarter sa tuig tungod sa pagpangandam alang sa holiday season.
Dugang pa, wala gihapoy kusog nga suporta gikan sa foreign direct investments (FDI), nga mikunhod og 17 porsyento sa unang quarter sa 2026. Sumala sa BMI, ang nagpadayon nga geopolitical tensions ug kawalay kasiguruhan sa internasyonal nga pamatigayon maoy nakapugong sa daghang mga investor sa pagsulod sa Pilipinas.
Taliwala paman niini, gilauman sa BMI nga mahimong molig-on gamay ang piso sa katapusan sa 2026 ngadto sa mga ₱61 matag dolyar, tungod sa pagdaghan sa remittances gikan sa mga Overseas Filipino Workers o OFWs atol sa holiday season ug sa gilaumang pagkunhod sa presyo sa lana sa kalibutan.
Sa laing bahin, gilauman usab sa BMI nga mosaka pa og 25 basis points ang policy rate sa Bangko Sentral ng Pilipinas ngadto sa 5 porsyento sa katapusan sa 2026. Apan kon magpadayon ang pagsaka sa presyo sa enerhiya ug inflation, posible pa kining dugangan og 50 basis points, aron mapalig-on ang piso ug mapugngan ang dugang nga paghuyang niini.
Photo Courtesy:Instagram
