Nahimong nag-unang babag sa nagpadayon nga negosasyon sa Pilipinas ang mga probisyon bahin sa agrikultura alang sa free trade agreement (FTA) uban sa European Union (EU) ug Chile, bisan pa man nga nagpabiling malaumon ang Department of Trade and Industry (DTI) nga mahuman ang duha ka kasabutan sa dili pa ang ASEAN Summit karong Nobyembre.
Gibutyag ni Trade Secretary Cristina Roque nga wala magkasabot ang mga negosyador sa Pilipinas ug EU atol sa ikapito nga hugna sa mga panaghisgot sa Brussels gikan sa Hunyo 29 hangtod Hulyo 3.
Bisan tuod gilauman sa DTI nga kini na unta ang katapusang hugna sa negosasyon, matod ni Roque nga miabot sa “deadlock” o wala’y kasulbaran ang mga diskusyon bahin sa mga probisyon sa agrikultura—usa ka isyu nga karon gipaningkamotan nga masulbad sa duha ka habig, lakip na sa lebel sa mga ministro.
Laing isyu nga nakapapugong sa negosasyon uban sa EU mao ang bahin sa pagpamalit sa gobyerno (government procurement).
Sumala ni Roque, nasulbad na sa duha ka habig ang maong isyu human sila nagkauyon nga ipatuman ang probisyon sa hinay-hinay o pinaagi sa mga hugna. Dugang pa niya, ang kasabutan uban sa EU mao ang mahimong unang trade pact sa Pilipinas nga maglakip og mga probisyon mahitungod sa pagpamalit sa gobyerno.
Photo Courtesy: StockCake
