Ipatuman sa Land Transportation Franchising and Regulatory Board (LTFRB) ang fixed pick-up fare alang sa mga Transport Network Vehicle Service (TNVS) sama sa ride-hailing services, aron matubag ang nagkataas nga gasto sa operasyon sa mga drayber ug ang mga reklamo sa mga pasahero.
Matod ni LTFRB Chairperson Vigor Mendoza II, ang pagbalik sa Memorandum Circular 2025-058 maoy “middle ground” aron mapanalipdan ang interes sa mga drayber ug mga pasahero.
Ubos sa polisiya, magsugod ang pagkwenta sa pick-up fares sa dihang madawat na ang booking, imbis nga sa pickup point. Gipasabot sa LTFRB nga makatabang kini sa pag-atubang sa trapiko ug uban pang operational challenges sa mga TNVS driver.
Ang fixed pick-up fare gilimitahan lamang sulod sa lima ka kilometro, ug dili tugotan ang pagsukol og dugang bayad lapas niini. Gidili usab ang Transportation Network Companies (TNCs) sa pagkuha og bahin o service fee gikan sa pick-up fare.
Gimando usab sa LTFRB nga klaro ug bulag ipakita ang pick-up fare sa fare breakdown sa dili pa makumpirma ang booking, ipahibalo daan ang kinatibuk-ang plite lakip ang pick-up fare, ug ilakip kini isip lahi nga entry sa electronic receipt o trip summary nga ihatag sa pasahero human sa biyahe.
Photo courtesy:Visor
