Gipaluhod ang Cebu Greats sa Caloocan Batang Kankaloo, 89-76, sa ilang home game sa Cebu Coliseum, hinungdan sa ilang ikaduhang sunod nga kapildihan sa 2026 MPBL season.
Human maputol ang pito ka sunod-sunod nilang kadaugan batok sa Biñan, napakyas usab ang Greats nga makabangon sa atubangan sa liboan ka Sugbuanong fans. Ang ilang rekord mikunhod ngadto sa 14 ka daog ug lima na ka kapildihan.
Nangulo sa kadaugan sa Caloocan si Jeff Manday, nga naghimo og 15 puntos, 14 rebounds, walo ka assists ug duha ka steals aron makadawat sa Best Player of the Game. Nakatampo usab sila Kymani Ladi ug Jammer Jamito og 17 puntos matag usa.
Bisan og nakaiskor og game-high nga 27 puntos si Mark Meneses, dili kini igo aron maluwas ang Cebu. Midugang si Ron Dennison og 11 puntos, samtang si Wowie Escosio adunay siyam ug si Dhon Reverente mitala og walo ka puntos ug 13 rebounds.
Napildi ang Cebu tungod sa hinay nga pagpamusil gikan sa three-point area, diin lima lamang sa ilang 32 ka tirada ang misulod, samtang ang Caloocan nagmalampuson sa 12 ka three-pointers.
Gisamutan pa ang duwa sa daghang technical fouls, pagpahawa sa mga manuwaay ug mga komprontasyon sa sulod sa korte nga maoy hinungdan nga hapit na sa tungang gabii nahuman ang duwa.
Photo courtesy: CDN Digital
