Usa ka 69 anyos nga lalaki ang nakasulod sa Guinness World Records human makadonar og kapin 30 ka galon o 113.5 ka litro nga dugo, katumbas sa 344 ka lata sa softdrinks.
Si Dan Ryan nagsugod sa pagdonar og dugo niadtong 1980, bisan pa sa iyang kahadlok sa dagom. Naengganyo siya sa pagdonar human sa hangyo sa iyang namatay nga igsoon nga idonar ang iyang dugo samtang buhi pa.
Sulod sa 46 ka tuig, padayon siyang nagdonar og dugo ug nakadawat na og 32 ka milestone pins gikan sa American Red Cross isip pag-ila sa iyang dakong kontribusyon. Matod ni Ryan, dako ang iyang kalipay nga nakab-ot ang maong rekord ug mas nalipay pa siya nga ang iyang 20 anyos nga apo nadasig usab sa iyang ehemplo ug nagsugod na usab sa pagdonar og dugo.
Samtang, nagkadaiya ang reaksyon sa mga netizen. Adunay mga nagdayeg sa iyang dedikasyon ug pagkamabinuligon, samtang ang uban nagbinuang nga “maypa si lolo kay walay kahadlok sa dagom, kaysa sa uban nga wala pa gani gitusok, nangluspad na.”
Photo Courtesy:Guinness World Records
