Nag-apod-apod ang Provincial Government sa Sarangani og 16 ka two-way portable radios ngadto sa 14 ka barangay sa Munisipyo sa Malapatan aron mapalig-on ang komunikasyon ug koordinasyon panahon sa mga emerhensya.
Gihimo ang maong lakang samtang padayon nga nag-atubang ang probinsya sa mga epekto sa magnitude 7.8 nga linog ug sa hanging habagat. Tumong niini nga mapaspas ang pagbayloay og impormasyon tali sa mga barangay, lokal nga panggamhanan, mga responder, ug sa Provincial Government aron dali matubag ang mga emerhensya ug mga panginahanglan sa komunidad.
Personal nga gidawat ni Malapatan Mayor Salway D. Sumbo Jr. uban sa 14 ka Punong Barangay ang mga communication equipment isip kabahin sa pagpalig-on sa disaster preparedness sa lungsod. Nagpasalamat usab ang Malapatan Association of Barangay Councils (ABC) sa suporta nga gihatag alang sa mga barangay.
Nahimong posible ang maong inisyatiba pinaagi sa panagtinabangay sa Ronda Probinsya, Sarangani Barangay Affairs Unit (SBAU), ug Provincial Disaster Risk Reduction and Management Office (PDRRMO), isip kabahin sa padayon nga paningkamot sa pagpalig-on sa komunikasyon ug kahandaan sa mga komunidad batok sa kalamidad.
Photo Courtesy:Sarangani Ronda Probinsya
