Misaka ngadto sa 10 hangtod 50 porsiyento ang paggamit sa digital fund transfers sa nasud, human mipaubos sa ilang transfer fees ang mga bangko ug e-wallet providers.
Sumala sa Bangko Sentral ng Pilipinas (BSP), ang pagkunhod sa bayronon nakadasig sa mas daghang Pilipino sa paggamit sa digital payment ug mahimong makahatag og bag-ong kusog sa kampanya alang sa financial inclusion.
Matud pa ni BSP Deputy Governor Mamerto Tangonan, maghimo pa ang BSP og mas lawom nga pagsusi sa datos sa katapusan ning bulana, apan ang unang mga report gikan sa mga bangko nagpakita na og dako nga pagsaka sa gidaghanon sa digital transactions.
Nisaka usab ang mga bag-ong nagbukas og bank account human gitugotan sa BSP nga gamiton ang National ID isip igo nga pamatuod sa identidad sa pag-abli og deposit ug transaction accounts.
Ubos sa BSP Circular Number 1238, gisiguro sa BSP nga ang transfer to transfer fees tali sa lain-laing bangko ug e-wallet dili mahimong dako ang bayronon .
Gilauman sa BSP nga kini nga lakang makatabang sa mas daghang Pilipino nga mosalig ug mogamit sa digital payments sa ilang adlaw-adlaw nga transaksyon.
Photo Courtesy: Mindgate solution
