Gitangtang sa House prosecution ang duha ka saksi sa impeachment trial ni Vice President Sara Duterte, nga mao sila si abogado Zuleika Lopez ug House Legislative Security Bureau Executive Director Capt. Belinda Bello.
Matod ni private prosecutor Lorna Kapunan, wala na kinahanglana ang ilang testimonya tungod kay napamatud-an na sa unang duha ka saksi ug sa mga dokumentong gipresentar ang mga punto nga ilang ipamatuod.
Si Lopez unta ang mopamatuod nga didto siya sa House detention center atol sa online press conference ni Duterte niadtong Nobyembre 23, 2024, ug nga tinuod ang video nga gigamit isip ebidensya. Apan giingon ni Kapunan nga dili na kini kinahanglan kay giila na mismo sa kampo sa depensa nga nahitabo ang maong press conference ug gigamit usab nila ang maong video sa ilang presentasyon.
Si Bello usab unta ang mopalig-on sa ebidensya bahin sa mando sa pagbalhin kang Lopez sulod sa detention facility, apan giingong suporta lamang kini sa uban nang ebidensya ug dili na kinahanglan ipresentar.
Tungod niini, mikunhod og duha ka saksi ang House prosecution sa pagpresentar sa ilang kaso ubos sa Article IV sa impeachment complaint, nga may kalabutan sa mga pahayag ni Duterte batok kang Presidente Ferdinand Marcos Jr., First Lady Liza Araneta-Marcos ug kaniadto nga House Speaker Martin Romualdez. Giingon ni Kapunan nga makatabang usab kini aron mapamubo ang gidugayon sa pagdungog sa maong artikulo sa impeachment trial.
Photo Courtesy: Philippine News Agency
