Giplanohan sa Energy Regulatory Commission (ERC) nga pahugtan ang proseso sa pagpili sa mga power supply deal aron masiguro ang patas nga kompetisyon ug mas mubo nga presyo sa kuryente alang sa mga konsumidor.
Matod ni ERC Chair ug CEO Francis Saturnino Juan, kinahanglan nga masusi una sa ERC ang Terms of Reference sa bidding aron masiguro nga walay mga kondisyon nga makababag sa ubang kwalipikadong power supplier sa pag-apil.
Ubos sa giplanong lagda, ang mga distribution utility ug system operator kinahanglan una nga mosumite sa ilang bidding requirements ngadto sa ERC alang sa ebalwasyon sa dili pa magpatigayon og public bidding.
Giingon ni Juan nga adunay mga rekisito nga posibleng makapagamay sa ihap sa mga partisipante, nga makaapekto sa patas nga kompetisyon sa pagpili sa power supplier.
Dugang niya, ang maong lakang makatabang sa pagsiguro nga ang mga power supply agreement mahimong transparent, kompetitibo ug makahatag sa labing ubos nga posible nga gasto sa kuryente alang sa mga konsumidor.
Photo Courtesy: Philippine News Agency
