Gihingusgan sa Philippine Sports Association for the Differently Abled (PHILSPADA) ang ilang grassroots recruitment program aron makapangita og bag-ong para-athletes nga mahimong mopasidungog sa Pilipinas sa internasyonal nga kompetisyon.
Matod ni PHILSPADA President Michael Barredo, nakigtambayayong sila sa Department of Education, lokal nga panggamhanan, mga eskwelahan ug civic organizations aron mailhan ang mga kabatan-onang adunay potensyal sa para-sports.
Gipadayag usab niya nga gipalapdan sa DepEd ang para-sports events sa mga kompetisyon sa eskwelahan gikan sa upat ngadto sa unom ka disiplina aron mas daghang atleta ang madiskubre sa sayong bahin pa lamang.
Sa pagkakaron, adunay 232 ka para-athletes ug 64 ka coaches ang anaa sa national pool nga nakadawat og allowances, benepisyo ug insentibo gikan sa gobyerno.
Gipasigarbo usab ni Barredo ang padayon nga maayong performance sa mga Pilipinong para-athletes sa internasyonal nga entablado, lakip ang ilang 45 ka bulawang medalya sa ASEAN Para Games sa Thailand ug walo ka bulawang medalyasa Asian Para Games sa Dubai.
Matod pa niya, pinaagi sa sports, daghang persons with disabilities ang nakab-ot ang ilang mga damgo ug nahimong mas lig-on ang ilang panginabuhi.
Photo Courtesy: Philippine News Agency
