Gipamatud-an sa House prosecution panel nga ang Senate impeachment court kinahanglan maghatag og higayon sa pag-usisa sa bank ug tax records ni Bise Presidente Sara Duterte, apil na ang uban pang importanteng ebidensya, aron makita sa mga senator-judges ang tibuok kamatuoran.
Matod ni House trial spokesperson ug Lanao del Sur Representative Zia Alonto Adiong, ang pagpresentar sa mga dokumento, mga saksi, ug testimonya makatabang sa Senado sa pagtuman sa ilang konstitusyonal nga katungdanan sa hustong paagi.
Sumala ni Adiong, ang pagtugot sa pagpagawas sa mga may kalabutan nga ebidensya usa usab ka pagrespeto sa mandato sa Senado sa paghusay sa impeachment case. Iyang giingon nga mas maayo kung mahatagan ang impeachment court sa kompleto nga impormasyon aron masabtan nila ang tanang anggulo sa kaso ug makahimo og patas ug husto nga desisyon. Ang bank ug tax records ni VP Sara gamiton isip suporta sa Article II sa impeachment complaint nga naghisgot sa giingong wala mapatin-aw nga bahandi ug kakulang sa pagdeklarar sa mga kabtangan sa Statement of Assets, Liabilities, and Net Worth o SALN.
Samtang, gipahayag ni House prosecution legal spokesperson ug counsel Benjamin Tolosa Jr. nga ilang respetohon ang desisyon sa impeachment court bahin sa subpoena, apan wala sila makakita og rason aron pugngan ang pagpresentar sa mga dokumento. Matod niya, dili angay kahadlokan ang pagpagawas sa ebidensya tungod kay pinaagi lamang niini mogawas ang kamatuoran. Iyang gipasiugda nga ang mas angay kahadlokan ang pagpugong sa mga ebidensya nga makatabang sa paghatag og hustong paghukom.
Photo courtesy: x.com
