Nadepensahan sa Padel Pilipinas ang ilang korona sa professional division sa Asia Pacific Padel Cup (APPC) 2026 human nila gihashasan og 3-0 sweep sa men’s, women’s, ug mixed categories ang lig-on nga Prescott Development Team sa Pakistan didto sa Play Padel McKinley West sa Taguig City.
Gipangulohan nila ni LA Cañizares ug Jason Tamayo ang kadaugan sa men’s division human gipildi sila si Abdullah Adnan ug Muhammad Salar sa iskor nga 6-3, 6-3, samtang sila si Marian Capadocia ug Joanna Tao Yee Tan maoy nanghawod sa women’s doubles batok nila ni Aqsa Khalid ug Sheeza Sajid. Giselyohan usab sa tandem nila ni Capadocia ug Tamayo ang hingpit nga dominasyon sa Pinoy squad human makuha ang dungganong daog sa mixed doubles category.
Tungod niining maong kalamposan, gihuptan gihapon sa Padel Pilipinas ang titulo isip kampeon sa pro division samtang nalandig sa ikaduhang dapit ang pambato sa Pakistan, ug nasakmit usab sa Ace Padel India ang ikatulong pwesto human mapildi ang PadThai Padel Thailand sa iskor nga 2-1.
Gawas sa maong korona, sila si Tamayo ug Tao Yee Tan maoy gipasidunggan isip male ug female Most Valuable Players (MVP) sa maong torneyo.
Ang maong dakong kalihokan gi-organisa sa Asia Pacific Padel Tour ug Padel Pilipinas—ang opisyal nga national sports association nga giila sa Philippine Sports Commission (PSC) ug Philippine Olympic Committee (POC) ubos sa pagpanguna ni president Jeff Cheng ug founder Senator Pia Cayetano
Photo Courtesy: Padel Pilipinas Fb
