Napalgang wala na’y kinabuhi sa mga residente ang usa ka 12-anyos nga batang lalaki human kini naanod sa baha ug nasangit sa natumbang sanga sa kahoy sa may suba sa Kulaman, Purok Katipunan, Barangay Dagatkidavao, Valencia City, Bukidnon kagahapon Hulyo 14, 2026, pasado alas 6:00 sa buntag.
Ang biktima, kinsa residente sa Little Baguio, San Fernando, naanod niadtong Hulyo 13, 2026, banda alas 4:20 sa hapon, uban sa iyang 6-anyos nga manghod ug ilang amahan samtang nagsakay og motorsiklo padulong unta sa Quezon. Pagtabok nila sa may spillway sa dam nga bahin sa Purok Sadiri, Barangay Dagatkidavao (boundary sa Brgy. Lumintao, Quezon), kalit silang naabtan sa kusog ug dako nga bul-og sa tubig-baha nga maoy hinungdan naanod ilang gisakyang motorsiklo.
Bisan pa man sa kakuyaw sa sitwasyon, swerteng daling nakalingkawas ug nakaluwas ang ilang amahan nga si Ramsey Quines Cardiente, apan ang iyang duha ka mga anak wala makasugakod ug daling nabanlas sa kusog nga sulog sa tubig.
Sa pagkakaron, padayon pa nga gipahigayon sa mga tig-rescue ang masubsob nga operasyon sa pagpangita sa 6-anyos nga manghod sa biktima nga nagpabiling missing o wala pa makit-an hangtod niining mga panahona.
Photo Courtesy: Dodong Golez
