Nakapahimulos sa libreng pagproseso sa ilang Birth Certificate ug uban pang mga kabalaka sa civil registration ang kapin 60 ka residente atol sa gipahigayon nga Libreng Rehistro sa Birth ug Marriage bag-o lang didto sa Barangay Imbayao, syudad sa Malaybalay
Gawas niini, siyam (9) ka mga magtiayon usab ang hingpit naka-aplay ug nagpa-interview alang sa gikatakdang Mass Wedding. Gipangulohan ang maong kalihokan ni Barangay Kapitan Jean T. Maputi, sa pakigtambayayong sa City Civil Registry Office (CCRO) ubos sa pagdumala ni CCRO Arnel S. Alagenio, aron mapaduol ug mapalig-on ang legal nga dokumentasyon sa komunidad.
Lakip sa mga serbisyong gihatag mao ang timely ug delayed birth registration, out-of-town registration pinaagi sa Birth Registration Assistance Project (BRAP), marriage registration, pagtulid sa mga sayop sa dokumento ubos sa RA 9048 ug RA 10172, ug pagdawat sa mga hangyo alang sa mga dokumento gikan sa PSA sama sa CENOMAR.
Aron mas mapagaan ang gasto sa mga benepisyaryo, ang Barangay Council sa Imbayao maoy misalo sa bayranan sa kapin 100 ka PSA documents, lakip na ang paglukat og sedula ug Barangay Certification.
Kini nga lakang kabahin sa nagpadayong tinguha sa kagamhanan sa paghatag og episyente ug de-kalidad nga serbisyo aron ang matag usa makabaton sa gikinahanglan nilang legal nga papel alang sa nagkalain-laing benepisyo sa gobyerno
Photo Courtesy:Civil Registry Office Malaybalay
