Mikunhod sa 988.65 milyones dolyar o ₱56.35 bilyon ang agricultural trade deficit sa Pilipinas niadtong bulan sa Mayo, ubos og 6.4 porsyento kumpara sa samang panahon niadtong miaging tuig, sumala sa Philippine Statistics Authority (PSA).
Base sa report, misaka sa 2.67 bilyones dolyar ang kinatibuk-ang baligya sa mga produktong agrikultural, nga gipalihok sa kusog nga pagtaas sa eksport sa mga produktong pang-uma.
Misaka og 12.8 porsyento ang agricultural exports ngadto sa 840.18 milyones dolyar, diin ang mga prutas ug nuts maoy nanguna sa mga produktong gipadala sa gawas sa nasud.
Taliwala pa niini, mas dako gihapon ang kantidad sa giangkat nga mga produktong agrikultural, nga miabot sa 1.83 bilyones dolyar, diin ang mga cereal sama sa bugas ug uban pang lugas maoy nag-unang gi-import.
Sa ASEAN, ang Malaysia maoy nag-unang pumapalit sa mga produktong agrikultural sa Pilipinas, samtang ang Vietnam nagpabiling labing dakong tinubdan sa giangkat nga mga produktong pang-uma sa nasud.
Sumala sa PSA, ang pagtaas sa eksport maoy nakatabang aron momenos ang trade deficit sa sektor sa agrikultura bisan pa nga nagpadayon ang pagsaka sa importasyon.
Photo Courtesy:Philippine News Agency
