Grabeng kadaot ang naangkon sa usa ka motorsiklo human kini mibangga sa kasugat nga van sa national highway sa Purok 2, Barangay Maragang, Tigbao, Zamboanga del Sur, alas 4:30 sa hapon Hulyo 12,2026.
Base sa inisyal nga imbestigasyon, padulong sa Dumalinao ang motorsiklo nga gimaneho ni Victor Jr. Eb-Eb, 20 anyos, apan sa dihang pag-abot sa usa subida ug kurbadang bahin, giingong misulod kini sa pikas lane ug mibangga sa kasugat nga Nissan van nga gimaneho ni Elmer Alcos.
Naka-angkon lamang ug gamay nga kadaot sa wala nga pultahan ang van, ug wala usab masamdan ang drayber ug mga pasahero niini, samtang ang driver sa single Motor dali nga gidala sa balay tambalanan alang sa dinalian nga medikasyon.
Mitubag dayon ang MDRRMO responders sa lugar sa aksidente, samtang nagpadayon pa ang imbestigasyon sa mga otoridad aron masuta ang hingpit nga hinungdan sa maong panagbangga.
