Nagpadayon pa ang search and retrieval operation sa Local Disaster Risk Reduction and Management Office (LDRRMO) sa koordinasyon sa Provincial Disaster Risk Reduction and Management Office (PDRRMO) sa mga suba sa Labangan ug Tukuran, Zamboanga del Sur, aron pangitaon ang duha ka mga biktima nga naanod sa baha nga pabilin pang missing.
Matud ni Ret. Police Brigadier General Atty. Faro Antonio Olaguera, PDRRMO Head, ikatulong adlaw na karon sa operasyon ug kutob na lamang karong adlawa ang gilatid nga retrieval operation kon walay bag-ong development.
Kahinumduman, usa sa mga missing mao si Joel Ompoc, 25 anyos, nga giingong nanikop sa suba sa Barangay Baclay, Tukuran, Zamboanga del Sur apan naabtan sa kusog nga bul-og sa tubig-baha ug naanod.
Ang ikaduhang biktima mao si King Amer Montilla, 23 anyos, nga nangatang og mga anod nga kahoy sa suba sa Labangan sa dihang kalit usab nga misaka ang lebel sa tubig ug naanod.
Nakigkoordinar na ang LDRRMOs, PDRRMOs sa Philippine Coast Guard (PCG) Zamboanga del Sur alang sa mas dinaliang search and retrieval operation sa duha ka mga missing person.
Samtang, nagpadayon ang panawagan sa mga otoridad sa publiko nga dili magpaduol o motabok sa mga suba ilabina kon adunay kusog nga ulan, tungod kay dali kining mosaka ug mahimong delikado sa kinabuhi.
