Mipirma og Memorandum of Agreement ang Armed Forces of the Philippines o AFP ug ang Makati Medical Center (MMC) aron mapalambo ang sistema sa pag-atiman sa panglawas sa mga sundalo ug mapaspasan ang digital transformation sa mga military hospital.
Gipangunahan ang ceremonial signing sa Makati City nila AFP Chief of Staff General Romeo Brawner Jr., Makati Medical Center Foundation Chairman Manuel V. Pangilinan, ug Foundation President Dr. Victor Gisbert.
Ang bag-ong kasabutan nagpalapad sa ilang panagtambayayong nga gisugdan pa niadtong 2018 ug 2021, nga kaniadto nagtutok lamang sa AFP Medical Center ug karon giapil na usab ang ubang military hospitals sa tibuok nasod.
Tumong sa maong kasabutan ang paghatag og mas dekalidad nga serbisyong medikal alang sa mga personnel sa AFP ug sa ilang kwalipikadong mga dependent.
Sumala sa AFP, ang lig-on ug himsog nga pwersa maoy importante aron epektibong matuman sa militar ang tahas sa pagpanalipod sa nasod ug pag-alagad sa katawhang Pilipino.
Photo Courtesy: Philippine News Agency
