Nanawagan si Kagawad Dexter Patana sa Barangay Managok, Malaybalay City, nga daling aksyonan sa Department of Public Works and Highways (DPWH) ang dugay nang problema sa box culvert sa ilang dapit nga maoy gituohang usa sa mga nag-unang hinungdan sa balik-balik nga pagbaha sa Purok 5 Langgasihan matag kusog ang ulan.
Sa eksklusibong pakighinabi sa Juander Radyo Malaybalay ngadto kang Kagawad Patana, iyang gibutyag nga kapin na sa usa ka tuig ang milabay sukad una nilang gireklamo ang maong problema ngadto sa ahensya. Apan luyo sa kamatuoran nga nahibal-an na sa mga hingtungdan ang hinungdan sa baha, hangtod karon wala pa gihapon kini maaksyonan ug padayon ang pag-antus sa mga residente.
Gisaysay usab sa opisyal nga dako ang kalipay sa mga lumulupyo sa dihang miabot kaniadto ang mga personahe sa DPWH aron magpahigayon og pre-construction activities. Kini alang sa gisaad nga flood control project nga adunay gigahin nga pondo nga nagkantidad og ₱200 milyon—diin ₱100 milyon niini gikan sa provincial allocation ug laing ₱100 milyon gikan sa district allocation.
Apan human sa maong kalihokan, wala na matuman ang gisaad nga rehabilitasyon sa maong kanal. Busa, hugot nga giawhag ni Patana ang DPWH nga ipadayon ug sugdan na ang maong proyekto aron mahunong na ang kalbaryo sa mga residente sa Purok 5 Langgasihan ug mapanalipdan ang ilang mga kabalayan ug panginabuhian
Samtang, giklaro ni Jaymaica P. Maraguinot, OIC sa DPWH-X Public Affairs, nga karon pa lamang tuiga napunduhan ang maong proyekto alang sa box culvert sa nahisgutang lugar. Giila sa ilang buhatan ang kamahinungdanon sa maong pasilidad tungod sa dako nga volume sa tubig nga gikan sa kabukiran ug nagaagi sa maong dapit. Isip tubag sa problema, gipasalig sa ahensya nga sugdan na ang pagtrabaho sa maong proyekto karong semanaha.
