Gipatawag sa Bangko Sentral ng Pilipinas (BSP) ang pipila ka mga bangko ug e-wallet operators aron ipasabot nganong nagpabiling taas o wala pa usab nila gipakunhod ang bayad sa electronic fund transfers, bisan pa nga adunay ubang mga institusyon nga nagpaubos na sa ilang InstaPay ug PESONet fees.
Sumala ni BSP Deputy Governor Mamerto Tangonan, ang mga payment service providers nga wala pa motuman sa bag-ong polisiya o adunay bayranan nga giisip nga taas base sa inisyal nga pagtimbang sa BSP, gihatagan og higayon nga ipatin-aw ang ilang pricing structure.
Gitin-aw sa BSP nga wala pa kini makapahimulos og pinal nga konklusyon batok sa mga nasangpit nga kompanya, tungod kay hatagan pa sila og oportunidad nga ipasabot ang basehan sa ilang mga singil.
Nasayran nga epektibo sukad Hulyo 4 ang BSP Circular 1238 nga nagmando nga ang transfer fees kinahanglan makatarunganon, base sa aktuwal nga gasto, ug klarong gipadayag sa mga kustomer. Samtang, ang gagmayng bayad pinaagi sa QRPh alang sa mga negosyante kinahanglan magpabiling walay bayad.
Samtang, daghang dagkong bangko ang nagpahibalo na sa pagkunhod o pagtangtang sa ilang transfer fees. Apan, giingon sa BSP nga ang mga bangko ug e-wallet providers nga magpadayon sa pagsingil og ₱10 alang sa interbank o off-us transfers kinahanglan makahatag og lig-on nga pamatuod nga uyon kini sa bag-ong regulasyon.
Gidugang pa sa BSP nga ang katuyoan sa maong lakang mao ang pagsiguro nga patas, makatarunganon, ug transparent ang mga bayranan sa electronic fund transfers alang sa tanang Pilipino.
Photo Courtesy: Fintech News Philippines
