Gipanawagan sa mga residente ang dinaliang aksyon sa goberno human nga nasinati nga krisis sa tubig sa syudad sa Surigao.
Gibutyag ni General Manager Engr. Benjamin Ensomo Jr., sa Surigao Metropolitan Water District (SMWD) nga ang kasamtangang kakulang sa suplay sa tubig sa Surigao City usa ka Natural nga panghitabo o phenomenon nga nasinati usab sa daghang lugar sa kalibotan.
Matud pa niya, dili lamang ang Surigao ang naapektuhan sa maong sitwasyon. Sumala sa opisyal, ang epekto sa El Niño maoy nag-unang hinungdan sa pagkunhod sa tinubdan sa tubig, hinungdan nga napugos ang SMWD sa pagpatuman sa rotation o puli-puling pagpa-awas sa tubig sa pipila ka mga barangay aron patas nga mahatagan og suplay ang mga konsumidor.
Gipasabot usab ni Engr. Ensomo Jr. nga padayon ang ilang pagmonitor sa kahimtang sa mga water source ug nangita og mga paagi aron mapadayon ang serbisyo bisan pa sa kakulang sa tubig nga dala sa taas nga panahon sa hulaw.
Taud-taod na nga nag-antos ang pipila ka mga residente gumikan sa kakulangon sa suplay sa tubig sa syudad.
