Gilauman sa Department of Trade and Industry (DTI) nga mas modagsa pa ang mga langyaw nga mamuhunan sa Pilipinas human opisyal nga maiklasipikar ang nasud isip upper-middle income economy.
Matod sa DTI, ang maong bag-ong klasipikasyon makapalig-on sa credit profile sa nasud, makadugang sa pagsalig sa mga foreign investors, ug magpakita nga andam ang Pilipinas alang sa dugang pang pamuhunan sa manufacturing, innovation, ug regional expansion.
Samtang, gitin-aw sa Department of Finance nga wala pa’y dakong epekto ang maong reclassification sa interes sa mga pautang gikan sa multilateral institutions. Sumala sa Malacañang, posible pang abton og tulo ka tuig ang pagmonitor sa maong status sa wala pa adunay gamay nga kausaban sa loan rates.
Base sa World Bank, nasulod ang Pilipinas sa upper-middle income category human misaka sa 4,850 US dollars ang gross national income o GNI per capita sa nasud niadtong 2025. Gibutyga usab sa DTI nga ang maong kalampusan resulta sa padayon nga pagsaka sa ekonomiya, pagtaas sa eksportasyon, ug pagsaka sa mga aprubadong pamuhunan sa nasud.
Dugang pa sa DTI, gilauman nga makatabang usab ang pagkapangulo sa Pilipinas sa ASEAN sa 2026 aron madani pa ang dagkong langyaw nga mamuhunan ug makahimo og mas daghang kalidad nga trabaho alang sa mga Pilipino.
Photo Courtesy:Withlocals
