Posibleng makasinati og pagkunhod sa presyo sa gasolina ang mga motorista sugod karong adlawa, Hulyo 7 hangtod 13, samtang gilauman usab ang pagsaka sa presyo sa diesel ug kerosene, sumala sa Department of Energy (DOE).
Matud ni DOE Secretary Sharon Garin, ang presyo sa gasolina mahimong moubos hangtod sa ₱1.75 matag litro. Apan, posible usab nga walay kausaban o mosaka kini og hangtod sa ₱0.25 matag litro, depende sa pagpresyo sa mga kompanya sa lana.
Samtang, ang diesel gilauman nga mosaka gikan sa ₱1.57 hangtod ₱3.57 matag litro, samtang ang kerosene mahimong mosaka og ₱1.70 hangtod ₱3.70 matag litro.
Ang maong mga banabana gibase sa allowable adjustment range nga gipagawas sa Oil Industry Management Bureau sa DOE.
Bisan pa sa gilaumang pagsaka sa presyo sa diesel ug kerosene, gipadayag ni Garin nga nagsugod na sa paghinay ang global oil market human sa mga pagtaas sa presyo tungod sa tensiyon sa Middle East.
Matud niini, ang kasagarang presyo sa krudo sa kalibotan mikunhod na ngadto sa ubos sa 80 dolyar matag baril, nga nagpakita nga nagkahinay na ang pagtaas sa presyo sa merkado.
Gidugang sa kalihim nga dili pa dayon mobalik sa lebel sa presyo sa wala pa ang kagubot ang presyo sa lana, apan ang padayon nga pagkunhod sa presyo sa krudo naghatag og paglaom nga ang pinakagrabeng pag-usab-usab sa merkado posibleng milabay na.
Naglaom usab ang DOE nga kung magpabiling malinawon ang kahimtang sa kalibotan ug dili na mosamot ang tensiyon sa mga nasud nga nagprodyus og lana, posible nga magpadayon ang pagkunhod sa presyo sa mga produktong petrolyo sa umaabot nga mga semana o bulan.
Photo courtesy: Philippine News Agency
