Ipatuman na sa Philippine Basketball Association (PBA) sa possession arrow rule sugod sa umaabot nga Governors’ Cup sa sunod bulan.
Gipahibalo kini ni PBA Commissioner Willie Marcial human sa miting uban sa mga coach sa 12 ka magdudula aron hisgutan ang mga bag-ong lagda nga ipatuman sa liga.
Matud ni Marcial, kabahin kini sa mga kausaban aron mas mapaduol ang PBA sa mga lagda nga gigamit sa FIBA ug makatabang sa pag-andam sa Gilas Pilipinas alang sa international tournament.
Ubos sa possession arrow rule, sa mga sitwasyon nga kasagarang manginahanglan og jumpball, ang possession arrow na ang magbuot kung kinsang team ang makapanag-iya sa bola.
Dugay nang gigamit sa FIBA ang maong sistema sukad pa niadtong 2003, apan ang PBA nagpadayon sa paggamit sa jumpball aron pagtino sa possession hangtod karon.
Apan bisan sa maong kausaban, magpabilin gihapon ang four 12-minute quarters ug ang unom ka personal fouls nga gitugotan matag magdudula.
Gipasabot ni Marcial nga padayon ang suporta sa PBA sa programa sa Gilas Pilipinas ubos sa Samahang Basketbol ng Pilipinas (SBP) aron mas mapalig-on ang kampanya sa nasudnong dula sa international competition.
Photo Courtesy: Fastbreak
