Gilauman sa Department of Agriculture (DA) nga maaprubahan na sa ikatulong kwarter ning tuiga ang AVAC live vaccine gikan sa Vietnam batok sa African Swine Fever (ASF).
Matud ni Agriculture Assistant Secretary Arnel de Mesa, gilauman nga makapagawas ang Bureau of Animal Industry (BAI) sa commercial release certification alang sa maong bakuna sa sunod nga bulan.
Bisan pa niini, adunay pipila ka proseso nga kinahanglan pang mahuman sa dili pa mahatagan og final approval ang bakuna. Kung maaprubahan na, mahimo nang ibaligya ang AVAC vaccine sa mga rehistradong outlet sa tibuok nasud aron magamit sa mga livestock hog raisers.
Base sa pinakaulahing talaan sa Bureau of Animal Industry niadtong Hunyo 5, adunay aktibong kaso sa African Swine Fever sa pito ka probinsya nga nahimutang sa lima ka rehiyon sa nasud.
Ang ASF maoy usa sa mga dakong hagit nga giatubang sa mga hog raisers tungod sa dakong kadaot niini sa produksyon ug panginabuhian sa mga magbaboy sa nasud.
Photo Courtesy: Number 2 Piggeries
