Mikaylap sa social media ang kasuko sa mga netizen human makita sa usa ka pet fair sa Shanghai ang usa ka Mexican hairless dog nga adunay daghang koloradong tattoo sa lawas.
Sumala sa mga nakatambong sa kalihokan, gipakita ug gipanghambog sa tag-iya ang iyang iro ngadto sa publiko. Nakurat ang daghang bisita sa dihang ilang nahibaloan nga permanente ug tinuod ang mga tattoo nga naa sa lawas sa mananap.
Mas misamot ang kontrobersiya human sa mga alegasyon nga walay gigamit nga anesthesia atol sa pagpatattoo sa iro, bisan pa man nga gisupak kini sa tattoo artist nga nag-ingon nga adunay gigamit nga anesthesia ug gihimo ang proseso ubos sa pagdumala sa usa ka beterinaryo.
Daghang animal rights advocates ug netizens ang mikondena sa maong binuhatan, nga ilang giisip nga posibleng porma sa animal cruelty o pag-abuso sa hayop.
Sumala sa pipila ka mga naka saksi sa iro sa pet fair, mamatikdan matod pag na-stress ug dili komportable ang kahimtang niini atol sa kalihokan.
Tungod sa kusog nga reaksyon sa publiko, gipahibalo sa mga organizer sa pet fair nga dili na nila tugotan ang tag-iya sa maong iro nga makatambong pa sa umaabot nilang mga kalihokan.
Samtang, ang tattoo artist nga naghimo sa tattoo nangayo og pasaylo sa publiko ug miingon nga wala niya tuyoa nga makapasakit o makahatag og negatibong epekto sa mananap ug sa mga nakakita niini online.
Photo Courtesy: Daily News
