Gipunterya sa mga digital fraudster ang paspas nga pagtubo sa parcel delivery ug logistics sector sa Pilipinas, sumala sa bag-ong datos nga gipagawas sa TransUnion.
Bisan pa nga misaka ngadto sa P2.74 trilyon ang kantidad sa digital economy sa nasud niadtong 2025, gipakita sa report nga ang logistics ug delivery ecosystem karon usa sa labing delikadong sektor nga maapektuhan sa online fraud.
Matud ni TransUnion Philippines Chief Commercial Officer Yogesh Daware, kasagarang gigamit sa mga manlimbong ang delivery updates, tracking links, cash-on-delivery o COD transactions, ug customer interactions aron makapangilad sa mga konsumidor pinaagi sa phishing ug social engineering attacks.
Gipasabot usab nga ang kusog nga pagdagsang sa online shopping pinaagi sa mga e-commerce platform nakapadako sa oportunidad sa mga cybercriminal sa pagpahimulos sa pagsalig sa mga kustomer panahon sa paghulat ug pagdawat sa ilang mga parcel.
Dugang pa sa report, 72 porsiyento sa mga Pilipino ang nakasinati o nahimong target sa mga fraud attempts, usa sa pinakataas nga rekord sa tibuok kalibutan.
Tungod niini, giawhag ang publiko nga magmatngon sa mga text message, links, ug online notifications nga may kalabutan sa delivery aron malikayan ang pagkahulog sa mga online scam ug pagpangawat sa personal nga impormasyon.
Photo Courtesy: Shutterstock
