Miabot na sa P97 bilyon ang giaprubahang renewable energy investments sa Philippine Economic Zone Authority (PEZA), nga naglakip sa 21 ka proyekto sa solar manufacturing ug renewable energy enterprises.
Sumala sa PEZA, ang maong mga proyekto nagpakita sa padayong pagsalig sa mga mamumuhunan sa sektor sa enerhiya sa Pilipinas.
Gilauman nga makahatag kini og kapin 1,300 ka trabaho alang sa mga Pilipino. Matud sa pamunuan, dako ang papel sa investment incentives, suporta sa polisiya ug panagtambayayong sa gobyerno ug pribadong sektor aron madani ang dugang nga mga negosyo sa ecozones.
Ang pagdagsa sa renewable energy investments gitan-aw nga makatabang sa pagpalig-on sa suplay sa kuryente ug pagpaubos sa pagsalig sa mahal nga imported nga gatong sa umaabot.
Dugang pa nga mamahimo usab kining oportunidad alang sa mga lokal nga supplier, construction workers ug mga negosyo nga mosuporta sa solar ug uban pang limpyo nga enerhiya nga proyekto.
Photo Courtesy: Business News Asia
