Tingkagol karon sa selda sa kapulisan ang usa ka 33-anyos nga lalaki human nadakpan sa buy-bust operation ug nakuhaan og gibanabanang PHP 102,000 nga kantidad sa gituohang shabu sa Barangay Diatagon, Lianga, Surigao del Sur, kagahapon sa hapon, Hunyo 24, 2026.
Giila ni PCOL Jeffrey Lawrence Mauricio, Provincial Director sa Surigao del Sur Police Provincial Office (SDSPPO), ang suspek nga si alyas “Pepoy”, kinsa gikonsiderar nga usa ka Street Level Individual (SLI) o bag-ong giila nga tigpayuhot og drayga sa maong dapit.
Gikasa ang operasyon bandang alas-4:50 sa hapon sa hiniusang pwersa sa Lianga Municipal Police Station, ubos sa pamunoan ni Acting Chief of Police PCPT Micko Alunan Ampatuan, uban ang mga ahente sa Philippine Drug Enforcement Agency (PDEA) Surigao del Sur.
Narekober gikan sa suspek ang limang (5) ka sachet sa crystalline substance nga gituohang shabu, nga may gibug-atong 15 gramos, usa ka PHP 500 bill nga gigamit isip buy-bust money, ug usa ka basyong kaha sa sigarilyo nga gigamit nga sudlanan sa kontrabando.
Gipahigayon ang pag-imbentaryo ug pagmarka sa mga ebidensya sa transparent nga pamaagi nga gisaksihan mismo sa opisyal sa barangay ug representante sa media. Gipahibalo sab ang suspek sa iyang mga katungod.
Ang suspek ug ang mga nakumpiskang ebidensya anaa karon sa Lianga MPS alang sa mandatory nga dokumentasyon ug drug testing, samtang giandam na ang kasong paglapas sa Republic Act No. 9165 o Comprehensive Dangerous Drugs Act of 2002 batok kaniya.
photo courtesy: SDSPPO
