Mokabat na sa 2,177 ang natala nga kaso sa leptospirosis sa nasud gikan Enero 4 hangtod Hunyo 6, 2026, sumala sa Department of Health (DOH). Mas taas kini og unom (6) ka porsyento kumpara sa parehas nga panahon sa niaging tuig.
Giingon sa DOH nga ang mga mag-uuma maoy kasagarang maapektuhan tungod sa ilang kanunay ug dugay nga pagtrabaho sa lapok ug tubig sa kaumahan.
Ang leptospirosis usa ka sakit nga gikan sa bakterya ug mahimong makuha sa pagkontak sa baha o lapok nga nahugawan sa ihi sa mga mananap sama sa ilaga.
Tungod niini, gihangyo sa DOH ang mga mag-uuma nga magmatngon ilabi na sa pagtrabaho sa basang umahan, ug magpakonsulta dayon sa health center kon adunay gibati nga mga sintomas.
Matud pa sa DOH, adunay doxycycline nga mahimong mahatag sa mga pasilidad panglawas base sa pagsusi ug tambag sa doktor. Apan gipahimangnoan ang publiko nga dili magpataka og inom og antibiotic o ubang tambal nga walay reseta, aron malikayan ang sayop nga dosis, peligro nga side effects, ug pagbatok sa lawas sa antibiotic.
Gidasig usab ang kooperasyon sa mga ahensya ug lokal nga panggamhanan aron mapalawom ang edukasyon ug proteksiyon sa mga mag-uuma.
Photo Courtesy: The Guardian
