Nag-atubang og dugang nga kasong kriminal ang gitawag nga “BGC Boys” o Bulacan Group of Contractors human gitugotan sa Department of Justice ang pagpasaka sa 44 ka criminal tax cases batok sa tulo ka kanhi opisyal sa Department of Public Works and Highways (DPWH).
Base sa Bureau of Internal Revenue, ang tulo ka kanhing opisyal gilangkuban nila Jaypee de Leon Mendoza, Brice Ericson Hernandez, ug Henry Alcantara, nga gipasanginlang adunay kapin P1.68 bilyon nga wala mabayring buhis.
Sumala sa BIR, nakit-an sa ilang lifestyle check nga adunay dakong kalainan tali sa gipadayag nga kita sa mga maong opisyal ug sa ilang aktuwal nga paggasto, lakip na ang kapakyasan sa pag-file sa income tax returns sulod sa pipila ka tuig.
Tungod sa nakitang probable cause sa DOJ, mahimo nang ipasaka ang mga kaso sa Court of Tax Appeals alang sa pormal nga paghusay.
Gipahayag usab ni BIR Commissioner Charlito Martin Mendoza nga ang maong lakang nagpakita sa padayon nga determinasyon sa ahensya sa pagpatuman sa balaod sa buhis nga patas ug subay sa due process.
Photo Courtesy: Philippine News Agency
