Patay on the spot ang usa ka lalaki nga driver sa depasaheroang multicab, human kini gipusil sa mga lalaki nga nakamotor didto sa Purok 6, Barangay Sikitan, Kidapawan City, pasado alas 5 sa hapon kagahapon, Hunyo 18 niining tuiga. Giila ang biktima nga si Alvin Brizuela, 33-anyos, minyo ug residente sa Purok 4, Barangay New Cebu, President Roxas, North Cotabato.
Sumala sa report, gikan sa Kidapawan City ang biktima ug paingon kini sa Pres. Roxas, ug samtang nanaog nga mga pasahero nga estudyante sa Highway sa Barangay Sikitan, kalit lamang kining gidikitan sa mga armado nga matod pa riding in tandem, ug gipusil ang ulo sa biktima nga maoy hinungdan sa iyang hinanaling kamatayon.
Human sa maong panghitabo, daling misibat ang suspek paingon sa wala matino nga direksyon. Sa pagkakaron, padayon pa ang imbestigasyon sa Kidapawan City Police, aron masayran kung unsa ang motibo sa nahitabong krimen.
