Giawhag sa usa ka business group executive ang hingpit nga pagpatuman sa mga industrial policy measures sa gobyerno sa Pilipinas aron mapalig-on pa ang ekonomiya sa nasud, ilabi na human sa gipaabot nga pag-abli pag-usab sa Strait of Hormuz, usa sa labing importanteng agianan sa lana sa kalibotan.
Sumala ni Federation of Philippine Industries (FPI) chairperson Elizabeth Lee, ang interim peace agreement tali sa United States ug Iran nga nakatakdang pirmahan karong semana, usa ka “cautiously good news” kay makahatag kini og kahupayan sa Pilipinas batok sa epekto sa krisis sa lana.
Sa miaging krisis sa Middle East, misaka sa kapin P100 ang litro sa gasolina ug mihinay usab ang piso kontra dolyar.
Giingon usab ni Lee nga ang pagpatuman sa mga balaod sama sa Tatak Pinoy Act ug CREATE MORE Act makatabang sa pagdani sa dugang nga investments ug pagpalig-on sa industriya sa nasud.
Dugang niya, ang pag-us-os sa presyo sa lana makapahupay sa gasto sa transportasyon ug produksiyon, nga makatabang sa pag-stabilize sa ekonomiya ug pagpabalik sa kumpiyansa sa mga mamumuhunan.
Photo Courtesy: Daily Tribune
