Gilauman sa kadaghanang ekonomista nga mopadayon ang Bangko Sentral ng Pilipinas (BSP) sa pagpataas sa interest rates sa ilang sunod nga policy meeting karong Hunyo 18, aron mapugngan ang padayon nga taas nga inflation sa nasud.
Bisan og mikunhod gamay ang inflation ngadto sa 6.8 porsyento niadtong Mayo gikan sa 7.2 porsyento sa Abril, nagpabilin gihapon kini nga mas taas kaysa sa target nga duha ngadto sa upat ka porsyento sa BSP.
Nagkalahi ang opinyon sa mga ekonomista kon unsa kadako ang sunod nga rate hike. Adunay nagtuo nga mosaka kini og 50 basis points samtang ang uban nagtan-aw lamang og 25 basis points nga pagtaas.
Sumala sa mga eksperto, nagpadayon ang hulga sa inflation tungod sa posible nga pagsaka sa presyo sa pagkaon ug enerhiya, epekto sa El Niño, pagmahal sa abono, ug kahuyang sa piso batok sa dolyar.
Matod nila, ang pagtaas sa interest rates makatabang sa pagkontrol sa pagsaka sa presyo sa mga palaliton ug sa pagpalig-on sa piso. Apan adunay mga ekonomista nga nagpasidaan nga ang sobra ka agresibong pagtaas sa interest rates mahimong makapahinay sa ekonomiya ug makaapekto sa paggasto sa mga konsumidor ug negosyo.
Ang desisyon sa Monetary Board sa BSP karong Hunyo 18 maoy gipaabot nga mahimong giya sa direksyon sa ekonomiya ug inflation sa mga mosunod nga bulan.
Photo Courtesy: Inquirer.net
