Misaka na sa 782 ang gidaghanon sa mga kumpirmadong kaso sa Ebola sa Democratic Republic of Congo human madugang ang 72 ka bag-ong kaso sulod lamang sa 24 ka oras, sumala sa pinakabag-ong datos sa gobyerno nga gipagawas niadtong Hunyo 14, 2026.
Lakip sa mga kumpirmadong kaso ang 181 ka namatay tungod sa maong sakit. Giingong usa kini sa pinakadakong pagsaka sa kaso sulod sa usa ka adlaw sukad nagsugod ang kasamtangang outbreak.
Sa pagkakaron, ang outbreak nagpabiling naka-konsentra sa tulo ka probinsya sa sidlakang bahin sa nasud, lakip ang Ituri, North Kivu, ug South Kivu.
Apan, nakumpirma usab sa unang higayon ang mga kaso sa Nia-Nia health zone sa Ituri ug Mabalako health zone sa North Kivu.
Base sa report, aduna nay kumpirmadong kaso nga 20 sa 36 ka health zones sa Ituri, 10 sa 34 ka health zones sa North Kivu, ug usa ka health zone sa South Kivu, nga nagpakita sa padayong pagkaylap sa sakit sa maong mga lugar.
Photo Courtesy : CBS
