Dili moubos sa 12 ka tawo ang namatay human mahagsa ang usa ka eroplano sa estado sa Missouri, Estados Unidos, niadtong Domingo. Sumala sa Missouri State Highway Patrol, nahitabo ang insidente duol sa Butler Memorial Airport sa syudad sa Butler.
Sa inisyal nga taho sa mga awtoridad, walay bisan usa nga naluwas sa maong trahedya. Lakip sa mga namatay ang 11 ka skydivers ug ang piloto sa eroplano.
Padayon pa karon ang imbestigasyon sa mga awtoridad aron matino ang hinungdan sa pagkahagsak sa eroplano. Ang Butler nahimutang mga 60 ka milya sa habagatan sa Kansas City, Missouri.
Sa pagkakaron, nakigkoordinar na ang mga may kalabutan nga ahensya sa mga pamilya sa mga biktima samtang nagpadayon ang imbestigasyon sa maong insidente.
Photo Courtesy: AP News
