Pormal nang gisugdan sa Department of Education (DepEd) ang LGU-Led Feeding Program sa Davao de Oro isip kabahin sa pagpalig-on sa School-Based Feeding Program pinaagi sa mas lig-on nga pakigtambayayong sa mga Local Government Unit ning bag-uhay lang.
Gibutyag ni Department of Education (DepEd) Assistant Secretary for Operations Roger Masapol atol sa pag-interview sa Juander Radyo News Team ang ubos sa maong programa, direkta nang ibalhin sa DepEd ngadto sa mga LGU ang pondo alang sa pagpakaon sa mga estudyante base sa gidaghanon sa mga benepisyaryo sa matag lokalidad.
Matod sa DepEd, ang paghiusa sa mga pondo ug kahinguhaan sa LGU ug sa ahensya makatabang sa pagpalapad ug pagpalig-on sa feeding program sa matag komunidad.
Pinaagi niini, dili lamang ang mga kabataan ang makabenepisyo pinaagi sa masustansiyang pagkaon, kundili usab ang mga mag-uuma ug kooperatiba nga adunay sigurado nga presyo alang sa ilang mga produkto. Gilauman usab nga motaas ang ilang kita ug mas molihok ang ekonomiya sa mga probinsya ug munisipyo.
Gipasabot sa DepEd nga usa sa mga hinungdan nganong dali nga nakumbinsi ang mga LGU sa pag-apil sa programa mao ang potensyal niini nga makahatag og dugang kita sa lokal nga ekonomiya. Tungod adunay siguradong kapadulngan ang mga utanon ug uban pang produkto sa mga mag-uuma, nga makatabang sa paglikay sa pagkasayang sa ilang ani.
Pinaagi sa LGU-Led Feeding Program, gilauman sa DepEd nga mas mapalambo ang kahimtang sa nutrisyon sa mga kabataan samtang gisuportahan usab ang panginabuhian sa mga lokal nga mag-uuma ug kooperatiba sa Davao de Oro.
