Gilugwayan sa Department of Human Settlements and Urban Development (DHSUD) hangtod Disyembre 18, 2026 ang deadline sa re-registration sa mga Homeowners’ Associations (HOA) nga una nang narehistro sa Securities and Exchange Commission ug Home Insurance Guarantee Corporation.
Gipirmahan ni DHSUD Secretary Jose Ramon Aliling ang Department Order 2026-007 nga naghatag og unom ka bulan nga extension gikan sa nakatakdang deadline nga Hunyo 18, 2026.
Sumala sa DHSUD, gihimo ang maong lakang human sa konsultasyon ug pagdawat sa mga suhestyon gikan sa mga stakeholder aron mas daghang homeowners’ associations ang makakompleto sa ilang re-registration.
Ubos sa Magna Carta for Homeowners and Homeowners Associations, gikinahanglan nga magparehistro pag-usab sa DHSUD ang tanang subdivisions ug government housing homeowners’ associations nga kaniadto narehistro sa SEC ug HIGC.
Gipasidaan sa DHSUD nga ang mga HOA nga mapakyas sa re-registration mahimong masuspenso ug dili na makagamit sa ilang mga katungod ug pribilehiyo nga gitugot sa balaod.
Alayon niini, giawhag sa ahensya ang tanang apektadong homeowners’ associations nga dili maghulat sa bag-ong deadline ug sugdan dayon ang proseso sa re-registration aron malikayan ang kalangan sa pagproseso sa mga dokumento.
Photo Courtesy: Malaya Business Insight
