Makadawat og cash incentives gikan sa lokal nga kagamhanan sa Mandaue City ang mga student-athletes ug coaches nga nakadaog og medalya sa Palarong Pambansa 2026 nga gihimo sa Agusan del Sur gikan Mayo 24 hangtod 28.
Matud ni Mayor Thadeo “Jonkie” Ouano, ang insentibo maoy pamaagi sa syudad sa pagpasidungog sa ilang paningkamot ug pagdala og dungog sa Mandaue City sa nasudnong kompetisyon.
Gihimo ang maong pahibalo atol sa programa sa Session Hall uban ni City Councilor Atty. Joel Seno, chairman sa Committee on Education, ug mga opisyal sa Department of Education-Mandaue City Division nga gipangulohan ni Schools Division Superintendent Dr. Bianito Dagatan Jr.
Ubos sa ordinansa sa siyudad, makadawat og P15,000 ang matag gold medalist, P10,000 ang silver medalist ug P7,000 ang bronze medalist. Ang mga coaches sa mga medal-winning athletes makadawat usab og katugbang nga insentibo.
Sa Palarong Pambansa 2026, nakatigom og 17 ka medalya ang dakbayan sa Mandaue ug nakatampo sa ika-upat nga puwesto sa Central Visayas sa overall standings. Kapin sa 10,000 ka atleta gikan sa tibuok nasud ang misalmot sa maong kompetisyon, diin ang National Capital Region (NCR) maoy nakadaog sa overall championship.
Photo Courtesy: CDN DIGITAL
