Gikustodiya sa pulisya sa China ang usa ka lalaki human siya giakusahan nga nagpasakit ug mga iro ug nagbaligya sa mga video sa maong pag-abuso pinaagi sa internet. Ang lalaki matod pa nagpakaaron-ingnon nga gusto mo-adopt ug mga hayop, apan iyang gipangpasakitan ang ubang mga iro ug iring nga iyang makuha.
Nabutyag ang maong isyu human usa ka itoy nga iyang gi-adopt nakit-an nga gibiyaan ug nakitang adunay grabeng samad. Tungod niini, daghang mga grupo ang nasuko ug nanawagan nga aksyonan ang maong lalaki.
Kapin sa 100 ka tawo ang nagprotesta sa gawas mismo sa iyang panimalay. Nagdala sila og mga plakard nga nag-awhag sa gobyerno nga maghimo og balaod batok sa pagpasakit sa mga hayop ug maghatag og silot sa mga nagbuhat niini.
Bisan gidakop na ang lalaki, wala pa gipahibalo sa pulisya kung unsang kaso ang iyang atubangon. Sa kasamtangan, wala pay klaro nga balaod sa China nga nagasilot sa pagpasakit sa mga hayop, apan daghang tawo ang nag-awhag nga adunay mas lig-on nga proteksyon alang sa mga kahayopan.
