Nakakita og bag-ong paagi ang daghang batan-on sa South Korea aron makapamalit nga walay magasto bisan usa ka sentimos.
Uso karon didto ang gitawag og “dopamine sites” o mga online shopping apps nga mura gyud og tinuod nga tindahan apan walay aktuwal nga paliton ug walay bayranan.
Sama sa mga sikat nga shopping platforms, mahimo kang mopili og produkto, mobasa og reviews, magbutang sa cart, ug mopindot pa gani sa “order now.” Human niini, makita pa gyud sa user nga adunay rider nga kunohay nagdala sa iyang order ug mahimong matrack sa mapa ang biyahe niini.
Matod sa mga gumagamit niini, bisan kabalo silang peke ang tanan, makahatag gihapon kini og excitement ug kalipay nga parehas sa tinuod nga online shopping.
Tungod sa kataas sa gasto sa panginabuhi, daghang kabatan-onan ang nalipay sa maong sistema kay nakasinati sila sa “shopping thrill” apan nakalikay sa pagkahurot sa sweldo.
Bisan pa niini, adunay mga eksperto nga nagpasidaan nga basin masanay gihapon ang mga tawo sa pagkaadik sa online shopping—ang kalahian lang, karon walay rider nga moabot ug walay parcel nga madawat gawas sa kalipay nga libre ra.”Add to cart lang, walay add sa utang!”
Photo courtesy: The Korea Times
