Gikondena sa korte sa lungsod sa Soissons sa amihanang bahin sa Pransiya ang usa ka lalaki tungod sa involuntary manslaughter, human ang iyang pit bull nga iro maoy giingong hinungdan sa kamatayon sa iyang mabdos nga uyab.
Gihatagan si Christophe Ellul, 51-anyos, og upat ka tuig nga suspindidong silot ug gimando usab sa korte nga ipapatay ang iro nga ginganlang Curtis.
Nahitabo ang trahedya niadtong Nobyembre 2019 sa dihang nakit-an ni Ellul ang lawas sa iyang uyab nga si Elisa Pilarski, 29-anyos nga unom ka bulan nga mabdos, sa usa ka lasang gawas sa Soissons.
Sumala sa imbestigasyon, kapin 50 ka samad sa pinaakan ang nakita sa lawas sa biktima. Sa wala pa ang insidente, nagtawag pa si Pilarski kang Ellul aron ipahibalo nga napaakan siya ug dili na niya makontrol ang ilang duha ka tuig nga American pit bull terrier nga si Curtis.
Dugay nga gibarugan ni Ellul nga dili agresibo ang iyang iro ug posible matod pa nga mga hunting hounds nga nag-apil sa usa ka pagpangayam sa maong lasang ang responsable sa pag-atake.
Apan, pinaagi sa DNA testing, napamatud-an nga si Curtis gayud ang nakapaak sa biktima. Gi-test usab ang 62 ka hunting hounds ug lima pa ka iro sa pagsuta, aron masiguro nga wala sila’y kalabotan sa maong insidente.
Matud pa sa mga awtoridad, iligal ang pag-import sa pit bulls sa Pransiya tungod kay giklasipikar kini isip delikadong klase sa iro.
Si Curtis, nga karon adunay edad nga walo ka tuig ug tunga, kapin unom ka tuig nang gibantayan sa usa ka kennel sukad sa panghitabo.
Samtang gimando sa korte ang pagpatay sa iro, nanawagan usab ang mga animal rights activists nga pasayloon kini. Usa ka petisyon sa giilang organisasyon sa mga pet lovers nga adunay kapin 80,000 ka pirma ang gipangayo nga ibalhin na lamang si Curtis ngadto sa usa ka animal shelter imbis nga ipapatay.
Photo Courtesy : Le Figaro
