Naghiusa ang mga nag-unang ospital sa dakbayan sa Tagum sa pagsuporta sa umaabot nga selebrasyon sa World Blood Donor Day karong Hunyo 14, 2026 aron mapalig-on ang kampanya sa boluntaryong pagdonar og dugo ug masiguro ang igo nga suplay alang sa mga nanginahanglan niini.
Lakip sa mga miapil sa hiniusang paningkamot mao ang Tagum Medical City, Christ the King Specialists Hospital, Tagum Global Medical Center, Medical Mission Group Hospital and Health Services Cooperative, ug ang Davao Regional Medical Center (DRMC) Blood Bank.
Sumala sa mga organizers, ang padayon nga suporta ug kooperasyon sa mga partner nga ospital, dako matud pa ang tabang sa pagpalig-on sa kapasidad sa maong siyudad, alang sa pagresponde sa mga emerhensya ug sa paghatag og tabang medikal ngadto sa mga pasyente nga nanginahanglan og dugo.
Gidasig usab ang publiko, ilabina ang mga kwalipikadong donors, nga magpadayon sa pag-apil sa mga blood donation drives, isip kabahin sa pagluwas sa kinabuhi ug pagpakita sa pagtinabangay alang sa kaayohan sa komunidad.
Pinaagi sa maong kalihokan, gilauman nga mas madugangan ang kahibalo sa katawhan bahin sa importansya sa pagdonar og dugo, ug sa papel niini sa pagluwas sa kinabuhi sa mga pasyente nga nanginahanglan og medikal nga pag-atiman.
Photo Courtesy : CHO Tagum
