Nag-andam na ang Bureau of Internal Revenue o BIR alang sa posibleng pagpatuman sa global top-up tax system nga gisuportahan sa Department of Finance aron masiguro nga ang dagkong multinasyonal nga kompanya nga nagnegosyo sa Pilipinas makabayad sa minimum nga buhis nga gitakda sa internasyonal nga balaod.
Sumala sa BIR, nakigpulong si Commissioner Charlito Martin Mendoza sa Department of Finance ug Fiscal Incentives Review Board aron hisgutan ang gitawag nga “Qualified Domestic Minimum Top-Up Tax of 2026” nga nagtinguha sa pagpatuman sa 15 porsyentong global minimum tax alang sa mga multinasyonal nga negosyo.
Matod ni Mendoza, samtang nag-usab-usab ang mga lagda sa internasyonal nga sistema sa pagbuhis, importante nga ang kita nga makuha sulod sa Pilipinas magpabiling mabuhisan sa nasud ug dili maadto sa ubang hurisdiksyon. Busa, nag-andam na ang BIR pinaagi sa pagbansay sa ilang mga empleyado ug pagpalig-on sa mga sistema ug proseso alang sa epektibong pagpatuman sa maong buhis.
Samtang, gibutyag ni Finance Assistant Secretary Euvimil Nina Asuncion nga daghang multinasyonal nga kompanya ang mas gusto nga motuman sa global minimum tax pinaagi sa lokal nga sistema sa Pilipinas kaysa mag-atubang sa mas komplikadong mga lagda sa ubang nasud.
Dugang pa, gipadayag sa Department of Finance nga kon napatuman pa kini sa miaging mga tuig, mahimo untang makadugang og kapin sa P54 bilyon nga kita matag tuig alang sa gobyerno. Ang maong pondo mahimong magamit sa nagkalain-laing programa ug proyekto nga makatabang sa nasudnong kalamboan.
Photo courtesy: iadb.org
